Поплавите кои изминативе денови создадоа пустош во Србија, не го заобиколија и најголемиот рудник за јаглен „Колубара“.
Како што оцени српскиот министер за енергетика, Александар Антиќ, рударскиот басен „Колубара“ претрпе штета од најмалку 100 милиони евра, но за само една недела застој, храбрите и вредни работници го обновија производството и пратија вагони со јаглен за потребите на термоцентралата „Никола Тесла“ во Обреновац.
Како што пренесе српски „Телеграф“, нивна екипа го посетила јагленокопот и разговарале со работниците, кои биле на своите работни места и се бореле со водената стихија за да го спасат од поплавите.
Со натчовечки сили како што вели еден од вработените, работниците со помош на војската и полицијата успеале во кобната ноќ да сочуваат поголем дел од инструментите, кои им се потребни за работа и во рекорден рок да направат да тргне првиот воз со јаглен за ТЕНТ.
-Водата навлезе во рудниците, но со брани, пумпи, со помош на војската, полицијата и храбрите луѓе успеавме да изградиме насипи и да ја намалиме штетата. Најважно е што ја сочувавме Колубара, иако опасноста беше голема-вели четириесетгодишен рудар.
Е. Г.