Турскиот премиер Ахмет Давутоглу ги отфрли „шпекулациите“ на опозицијата за идна турска воена интервенција во Сирија.
– Нема ситуација во овој момент која бара ангажирање на Турција, изјави Давутоглу, а пренесува весникот „Хуриет“.
Претходно неделава левичарската Републиканска народна партија објави дека исламско-конзервативниот режим на власта би можел да прибегне кон воени операции во Сирија за зголемување на популарноста пред парламентарните избори на 7 јуни.
– Турција ќе започне воена операција во Сирија вечерва или во петок, изјави главниот претставник на партијата Гурсел Текин, повикувајќи се на доверлив извор.
Турскиот премиер ваквите тврдења ги оцени како шпекулации без никаква основа.
Турција е отворено критички настроена кон режимот на сирискиот претседател Башар ал Асад и ги поддржува сириските бунтовнички групи, додека на турска територија се наоѓаат речиси два милиони бегалци.