Турската полиција изврши денеска претрес на 12 локации и уапси 15 лица, осомничени за прислушување на канцеларијата на премиерот Реџеп Таип Ердоган и на други високи функционери.
Операциите се извршени во Анкара и во други турски градови, а меѓу уапсените е и поранешен телохранител на Ердоган.
Обвинителот Дуран Четин ги нареди претресите и апсењата на осомничените, меѓу кои има и полициски службеници.
Масовната полициска операција почна рано изутрината.
Ердоган кон крајот на декември изјави дека во неговата канцеларија и во неговиот дом биле откриени апарати за прислушување. Тој истакна дека тоа претставува откривање на „масовно шпионирање“.
Ердоган и неговата владејачка Партија на правдата и развојот за прислушувањата го обвинуваат влијателниот проповедник Фетулах Ѓулен.