Турција денеска издаде два указа, во согласност со вонредната состојба во земјата, со кои смени над 2.000 припадници на полицијата и стотици припадници на армијата и на Советот за информациски технологии и информации (БTK – надзорен орган за турските телекомуникациски оператори), пренесоа британските медиуми.
Припадниците на безбедносните служби се сменети во врска со обидот за преврат од минатиот месец и се осомничени за врски со исламскиот проповедник Фетула Ѓулен, кого властите во Анкара го обвинуваат за организирање на пучот.
Указите се објавени во Службен весник. Тие во себе уште ја вклучуваат одлуката за затворање на Дирекцијата за телекомуникации (ТИБ) и префрлање на нејзините надлежности врз БТК, и второ, дека од сега претседателот на државата ќе го назначува шефот на вооружените сили.
Со претходните укази Турција веќе смени илјадници членови на силите за безбедност и нареди затворање на илјадници приватни училишта, фондации и други институции, осомничени за врски со Ѓулен.
Последниот бран смени вклучува 2.360 полициски службеници, над 100 воени лица и 196 службеници на БТК.
Паралелно со десетиците илјади веќе отстранети или сменети државни службеници, во масовните чистки по неуспешниот преврат се приведени над 35.000 лица, потсетуваат британските медиуми.