Косовската претседателка Атифете Јахјага денеска ги поддржа ставовите на Приштина изнесени во дијалогот со Белград во Брисел, а премиерот Хашим Тачи истакна дека посредничката во разговорите, високиот претставник на Европската унија за надворешна политика и безбедност до 9 април ќе биде информирана за одлуките, кои двете страни ги донеле за неусогласените ставови.
– Страните не успеале да ги усогласат сите ставови и побарано е дополнително време со цел одговорно да ги донесат одлуките. Ештон до 9 април ќе биде информирана за одлуките. Следните денови европската и американската дипломатија ќе ги продолжат напорите за да ги уверат двете страни да постигнат спогодба и да се гарантира нејзиното спроведување, изјави Тачи, информирајќи ја Јахјага за разговорите во Брисел.
Тачи исто така изјави дека состанокот минал во конструктивна атмосфера.
Јахјага за време на состанокот со косовскиот премиер и координаторот на политичкиот дијалог Бљерим Шаља истакна дека дијалогот меѓу двете земји влијае на воспоставувањето на нормални односи, кои треба да им помогнат на патот на европските интеграции, се наведува во соопштението од кабинетот на претседателката.