Претседателот на Владата на Србија Ивица Дачиќ разговараше со генералниот секретар на Обединетите нации Бан Ки-мун, при што двајцата ги осудиле случувањата со манастирот Високи Дечани и оценија оти мора да продолжи политичкиот дијалог меѓу Белград и Приштина.
Дачиќ, кој престојува во повеќедневна посета на САД, ја нагласи важноста на присуството на ОН на Косово, истакнувајќи дека Србите на Косово најмногу му веруваат на УНМИК, јави Танјуг.
– Заеднички ја истакнавме важноста на присуството на ОН на Косово и Метохија и уште еднаш му повторив дека Србија најмногу и верува и можеби единствено и верува на мисијата на ОН на Косово и оти затоа со големо негодување ги следиме најавите за можно намалување на нејзините надлежности, рече Дачиќ.
Тој синоќа истакна дека во разговорот е заклучено оти се што се случувало во рамки на политичкиот процес мора да биде статусно неутрално, дека мора да биде во согласност со резолуцијата 1244 и оти Бан стои на располагање ОН да бидат што е можно поприсутни преку претставникот на Косово.
Дачиќ претходно се сретна и со американскиот заменик-државен секретар Вилијам Барнс, кој изразил трајна поддршка за европската иднина на Србија.