Кипарската министерка за надворешни работи Ерато Козаку-Маркули ја демантираше информацијата за создавање руска воено-морска база на островот.
Таа се наоѓа во еднодневна посета на Москва, каде има средба со рускиот колега Сергеј Лавров.
Освен тоа, Козаку-Маркули за време на посетата истакна и дека Никозија не прифаќа странска интервенција во Сирија.
„Тоа ќе предизвика тензична ситуација, која ќе има драматични последици за целиот регион, кои нема да можат да се контролираат“, додаде шефицата на кипарската дипломатија.
Лавров, пак, од своја страна по средбата истакна дека било разговарано и за визната либерализација меѓу Русија и ЕУ, што е од голема важност и приоритет на земјата.
„Доколку процедурата за укинување на визите се забави тогаш Москва сака да договори дополнителни мерки за олеснување на визниот режим“, објасни рускиот министер.