Турскиот премиер Реџеп Таип Ердоган го продолжи судирот со војската и презема се поголема моќ во државата во која до неодамна имаше важна политичка улога.
Стотици воени офицери и генерали се фрлени во затворите под обвинение дека ковале завера и планирале уривање на неговата власт. Ердоган кој е десет години на власт, се повеќе се соочува со критики дури и од сопствените редови, дека со овие потези настојува да го угуши секуларниот карактер на Турција.
Судењето за 325 офицери заврши овој петок после процесот кој траеше 21 месец. Изречени им се затворски казни од 6 до 20 години затвор поради наводната завера од пред 10 години, кога исламистичката партија на Ердоган за прв пат со мнозинство гласови ја освои власта.
По пресудите од овој петок, стотици излегоа на плоштадот Таксим, во центарот на Истанбул, за да протестираат против се поголемата репресија која ја спроведува Ердоган.