Романскиот Парламент денеска изгласа одземање на овластувањата на претседателот на државата Трајан Басеску, поради кршење на основните закони.
Од 432 пратеници, 258 гласаа „за“ суспензија на Басеску.
Пратениците на романскиот Парламент одлучуваа денеска за суспензија на претседателот Басеску поради обвиненија за кршење на Уставот, откако трипартиската владејачка коалиција на левиот центар го товари дека незаконски ги презел овластувањата од премиерот кога во 2010 година објави драстични мерки за штедење и оти ја нарушил независноста на судството.
Според романскиот Устав, Парламентот може да ги одземе овластувањата на претседателот на државата поради „сериозно“ кршење на основните закони.
Суспензијата на Басеску се уште не значи и негова смена, откако, според процедурата, до тоа може да дојде дури на референдум кој треба да биде одржан во рок од еден месец.