Албанскиот премиер Еди Рама денеска во Котор изјави дека земјите кои преговараат со Европската Унија треба да бидат дел од политичкиот простор на ЕУ за подобро да се разбере за што се работи и како реформите се спроведуваат во пракса.
Во своето обраќање на Самитот на лидерите на земјите од Западен Балкан, Рама рече дека смета оти не треба да се чека да се спроведат сите реформи за ЕУ да ги отвори вратите за земјите од Западен Балкан.
– Треба да бидеме дел од Унијата пред да ги спроведеме сите реформи за да видиме како тоа се спроведува во пракса и за полесно да се прилагодиме на пазарот на кој припаѓаме, рече Рама.
Тој го изрази својот ентузијазам и им се заблагодари на Оливер Вархеји и на Комисијата за нивната посветеност.
„Напредокот што го постигнавме од последната средба во Скопје говори сам за себе. Подготвивме индивидуални реформски планови, идентификувавме клучни иницијативи кои ќе не доближат до заедничкиот пазар и, конечно, почнавме да се подготвуваме за заеднички регионален пазар. Накратко, подготвени сме“, изјави Рама.