Националната метеоролошка администрација на Романија издаде предупредување за „портокалов код“ за опасност од поплави од утре изутрина за реките во јужните окрузи Мхединц, Горж, Долж, Олт, Арджеш, Телеорман и Дамбовиц.
Вицепремиерот Ливиу Драгнеа, кој претседавашe со седницата на штабот за вонредни ситуации во зградата на Владата, изјави дека вестите сосема не се добри што се однесува до метеоролошката прогноза.
Драгнеа даде рок од два часа на окрузите да испратат во Инспекторатот за вонредни ситуации план за дејствување, со цел да се избегне повторно поплавување на населените места, што беа погодени од водената стихија пред неколку дена, наведува весникот „Гандул“.
Четири лица загинаа, петмина се водат како исчезнати, а стотици беа евакуирани кон крајот на минатата недела во јужните окрузи на Романија, кои беа засегнати од поплави по поројните дождови.