Нова навигациска информација (Навтекс) издаде Турција за сеизмички истражувања во Источниот Медитеран до 1 септември, на што, според грчките медиуми, Грција одговорила со контра- Навтекс за истиот период, јави дописничката на МИА од Атина.
Тензијата во Источниот Медитеран продолжува со несмален интензитет, а и двете земји тврдат дека делот во кој турскиот брод „Оруч Рејс“ најавува сеизмички истражувања е дел од нивниот континентален гребен.
Медиумите во Грција коментираат дека новите активности на Турција се реакција на грчко- египетскиот договор за одредување на Ексклузивната економска зона, што вчера беше ратификуван од грчка страна.
За ситуацијата во Источниот Медитеран, американскиот претседател Доналд Трамп завчера телефонски разговараше со грчкиот премиер Кирјакос Мицотакис и со турскиот претседател Реџеп Таип Ердоган.
Според грчките медиуми, Трамп и Мицотакис имале и втор телефонски разговор, во средата на полноќ. за американскиот претседател да го извести грчкиот премиер за разговорите со Ердоган, а Трамп повторил дека посакува деескалација на тензиите.
Шефот на грчката дипломатија Никос Дендиас е во Брисел на неформалниот состанок на министрите за надворешни работи на ЕУ (Гимних), а Грција очекува високиот претставник за надворешна политика на Унијата Жозеп Борел да ја претстави листата со санкции за Турција, во случај, како што вчера рече владиниот портпарол Стелиос Пецас, земјата „да продолжи со прекршувањата и провокацијата“.