Албанскиот премиер ја обвини Велика Британија дека ги користи граѓаните на неговата земја како изговор за нејзината неуспешна имиграциска политика, по навредливите коментари на британските министри за порастот на бројот на албанските баратели на азил.
Еди Рама ја нападна „лудата“ и „несериозната“ реторика на Британија, која тврди дека Албанците „се причина за сиот криминал и проблеми со границите“.
Во серија објави на Твитер, Рама рече дека британската реторика завршила со казнување на невините, вклучително и бизнисмени и вредни Албанци кои плаќале даноци во Британија.
Неговите коментари уследија по тврдењата на британските министри дека Албанците стојат зад порастот на пристигнувањето на мали бродови преку Ла Манш и дека многу од нив се вклучени во организиран криминал.
Според податоците на британската влада објавени во средата, Албанците сочинуваат 42 отсто од луѓето кои патуваат со мали чамци меѓу мај и септември оваа година. Во тие пет месеци пристигнале нешто повеќе од 11.000 Албанци, во споредба со 815 во 2020 година, покажуваат бројките.
Запрашан за коментарите на Рама, портпаролот на британската влада рече дека британската влада е посветена на градење соработка со Албанците, вклучително и борба против илегалната миграција.
„Работејќи заедно, ќе продолжиме да ја користиме секоја можност за пресретнување на активностите на организираните криминални групи и шверцерите на луѓе“, рече портпаролот.
Во понеделникот, британската министерка за внатрешни работи Суела Браверман изјави дека има зголемување на бројот на пристигнувања на Албанци и дека тоа се особено млади, самци, кои се или дел од организирани криминални групи или се вклучени во криминални активности како што е дрогата.
Рама рече дека 70 отсто од 140.000 Албанци кои се преселиле во Британија претходно живееле во богати европски земји како Италија и Грција и не патувале директно од Албанија.
Тој рече дека Британија мора да се однесува со почит кон неговата земја ако сака да направи повеќе за да помогне во решавањето на проблемот со мигрантите.
„Албанците во Велика Британија работат напорно и ги плаќаат даноците. Обединетото Кралство треба да се бори против криминалните групи од сите националности и да престане да ги дискриминира“ Албанците, нагласи Рама.