Претставници на Националниот совет на македонското национално малцинство во Република Србија предводени од претседателката Зорица Митровиќ, претседателот на Извршниот одбор Благоја Соколовски и секретарот Марјан Јованоски, како и други членови на Советот и повеќе припадници на македонската заедница во Србија, попладнево положија свежо цвеќе и запалија свеќи пред Амбасадата на Македонија во Белград по повод трагедијата во Кочани.
„Мислите и срцата на Македонците во Србија се со семејствата на 59 загинати и 163 повредени во трагедијата во Кочани“.
Припадниците на македонската заедница во Србија изразија искрено сочувство и посакаа никогаш повеќе да не се повтори таква или слична трагедија. Воедно изразија надеж и уверување дека Македонија како држава од оваа ситуација ќе излезе посилна, похомогенизирана и пообединета.
Македонскиот национален совет во Србија соопшти дека во вторник, на 18 март 2025 година, во сите свои подрачни канцеларии во Србија или во канцелариите на македонските здруженија во сите поголеми градови во земјата, ќе отвори книги на жалост каде што сите што сакаат ќе можат да изразат сочувство за жртвите.
