Од вчера по сртовите на планината Олимп, на Халкидики, на полуостровот Пелопонез и околината на градот Јанина, во западна Грција, беснеат нови пожари, соопштуваат грчките медиуми.
Пожарот во реонот на Касандра, на Халкидики, избувна на ѓубриште, а останатите пожари се шумски.
Во меѓувреме, делумно се совладани двата пожара – едниот во реонот на Коринт, а вториот на островот Крит, каде огнот уништи животни, илјадници декари насади и предизвика штети врз згради и куќи.
Во гаснењето учествуваат копнени и воздушни противпожарни екипи, а исто така и армиски единици и доброволци.
Според метеоролозите температурите во цела Грција денеска ќе достигнат 41 степен.
Грчката цивилна заштита предупредува за опасност од нови пожари.