Албанското обвинителство го обвини поранешниот премиер Сали Бериша и неговиот зет за корупција поврзана со договорот за купопродажба на терени и објекти за спортски клубови, соопштија денеска истражителите.
Канцеларијата на Специјалното обвинителство за борба против корупција и организиран криминал, познато како СПАК, во обвинението обвини дека Бериша го искористил своето влијание како премиер од 2005 до 2009 година за да изврши притисок „да ги заврши процедурите за приватизација во корист на другите, вклучително и неговата сопруг ќерка“.
Неговиот зет е уапсен вчера вечерта, а Бериша е пратеник, па има имунитет од гонење. Нему му е забрането да ја напушта државата и има обврска да се пријави во полиција.
Кривичната постапка беше покрената во 2020 година кога актуелниот министер за внатрешни работи Таулант Бала го обвини Бериша дека е вклучен во приватизацијата на теренот и другите спортски објекти на ФК Партизани во албанскиот главен град Тирана, кои подоцна беа заменети со катни згради.
Бериша го обвини премиерот Еди Рама дека го организирал целиот случај.
„Тој им нареди на своите платеници обвинители. Обвинувањата се неосновани и се директни политички напади на Еди Рама врз мене“, им изјави Бериша на новинарите.
Соединетите Американски Држави им забранија на Бериша и неговото семејство да влезат во земјата во 2021 година со образложение дека како премиер бил вмешан во „коруптивни дела како проневера на јавни средства и мешање во јавни процеси, што вклучува злоупотреба на моќта за лична корист и збогатување на политичките сојузници и членовите на семејството“.
Бериша беше претседател од 1992 до 1997 година, веднаш по падот на комунизмот во Албанија, и премиер од 2005 до 2013 година. Тој сега е лидер на Демократската партија, најголемата опозициска партија, но води одделни правни битки за неговото лидерство со друга партиска фракција.