Во албанскиот пристанишен град Драч полицијата синоќа открила и запленила 800 килограми марихуана. Дрогата била скриена во шлепер, кој пренесувал градежен материјал, пред истиот да влезе во траектот кој сообраќал на релација Драч-Анкона.
Полицијата го привела возачот на камониот 40-годишниот Ермир Мемети, жител на Драч, но се сомнева дека зад него се крие поголема добро организирана нарко-група, јави дописникот на МИА од Тирана.
Полицијата потврди дека ова е шести случај во изминатите денови од декември во кој се запленети поголеми количества марихуана, во обид да биде прошверцувана во Италија.
Пред три дена запленети беа 300 килограми марихуана, скриени во камион кој требало да замине со траектот кој сообраќа на релација Драч-Бари.