„Колку повеќе ФИРОМ инсистира на идеологијата на македонизмот, толку повеќе ќе наидува на затвоени врати од НАТО и ЕУ“, јасна и остра порака од грчкиот претседател Каролос Папуљас.
„Монополизацијата на терминот Македонија и неговите деривати во името на државата, идентитетот и јазикот не ја рефлектира реалноста во регионот. Во согласност со резолуцијата на Советот за безбедност, договореното име не може да биде само за меѓународна или делумна употреба. Тоа мора да биде име со географска одредница за севкупна употреба. Се додека Скопје инсистира на идеологијата за Македонизам, вратата на НАТО ќе остане затворена, а процесот на пристапување кон ЕУ – замрзнат“, изјавил Папуљас.
Папуљас рекол дека грчката позиција во преговорите останува конструктивна, но и стабилна. Изјавата ја дал на свечената вечера со неговиот бугарски колега Росен Плевнелиев.
Плевнелиев се воздржал од коментар, но неодамна бугарскиот премиер Бојко Борисов најави дека и Бугарија има намера да постави свои услови за решението на македонско-грчкото прашање, и дека за нив е неприфатливо име со географска одредница.