Началникот на Генералштабот на грчката армија генерал потполковник Константинос Зиазиас неочекувано поднесе оставка, неколку часа пред почетокот на важната владина седница за воената политика, образложувајќи ја од „етичка причина и достоинство“.
Во соопштението од армијата се наведува дека Зиазиас ја поднел оставката во два часот по полноќ, објаснувајќи дека таа е поднесена од причини кои се поврзани со етиката и достоинството, како неговото така и на армијата. Во документот не се наведуваат детали, а владините функционери одбија да ја коментираат.
Оставката доаѓа само неколку часа пред планираната за денеска седница на Советот за надворешна политика и одбрана на Грција, предводен од грчкиот премиер Андонис Самарас.
Зиазиас беше назначен на оваа функција пред девет месеци, малку пред претходната социјалистичка влада да поднесе оставка.