Нова опасност му се заканува на Балканот, додека спасувачките екипи се борат со поплавите и го евакуираат населението, огромен број на удавени животни претставуваат опасност по здравјето на луѓето.
Српската ветеринарна инспекција соопшти дека досега во земјата се уништени 140 тони трупови на животни. Инспекцијата ги предупредува граѓаните да не се справуваат сами со труповите на животните туку да ги чекаат ветеринарните екипи, кои со специјални возила ги носат животните и го дезинфицираат теренот.
Србија се согласи да ги преземе и труповите на животните од Босна и Херцеговина и покрај тоа што со Закон е забрането внесување на трупови на животни, кои се сметаат за отпад од прва категорија.
Фарма во близина на босанскиот град Шамац соопшти дека изгубила од 450 до 500 крави.
Големото количество на дожд и влажноста создаваат опасност од развој на различни болести на растенијата, кои можат да предизвикаат епидемии, предупредуваат агрометеоролозите. Српското Министерство за земјоделство ги предупреди земјоделците да не собираат плодови се додека целосно не се повлечи водата поради опасност од бактериолошко и хемиско загадување.