Западниот Балкан претставува стратешки регион за Европа и иако тој се уште не е целосно дел од ЕУ, сепак е Европа, изјави денеска високата претставничка на Унијата за надворешна политика и безбедност, Федерика Могерини.
Пред почетокот на денешната средба на министрите за надворешни работи на земјите членки на ЕУ во Луксембург, Могерини нагласи дека на состанокот ќе бидат резменети мислење како „подобро да се соработува со партнерите од Западен Балкан за заедничка безбедност и просперитет“.
Таа најави дека утре вечер по усвојувањето на извештаите за напредокот на земјите кои се во процес на евроитеграции, ќе отпатува во Западниот Балкан, при што ќе ги посети Македонија, Албанија, Србија и Црна Гора.
Расправата на денешната министерска средба за напредокот на земјите од регионот, ќе биде во рамки на подготовките за претстојниот самит ЕУ-Западен Балкан, што ќе се одржи на 17 мај во Софија.