Додека грчкиот остров Санторини е погоден од земјотрес по земјотрес, грчкиот премиер Киријакос Мицотакис ги повика жителите да останат смирени и „да ги слушаат упатствата на Цивилната заштита“.
Последниот земјотрес, со јачина од 4,9 степени според Рихтеровата скала, го погоди брегот на грчкиот остров Санторини, откако од петокот беше регистрирана зголемена сеизмичка активност во областа, што поттикна мерки на претпазливост.
Како што пренесува порталот „Катимерини“, повикувајќи се на грчкиот сеизмолошки институт, земјотресот се случил во 14 часот и 17 минути по локално време на длабочина од околу 5 километри, на околу 18 километри од островот Аморгос.
Повеќе од 200 земјотреси се регистрирани во областа околу грчкиот остров Санторини во изминатите 48 часа, а зголемената сеизмичка активност предизвика загриженост кај властите и научниците, што го натера грчкиот премиер Киријакос Мицотакис да одржи состанок со претставници на надлежните служби.