Иако се распадна откако Тајип Ердоган победи на претседателските и парламентарните избори во 2023 година, турската опозиција ќе се обиде да му возврати на денешните локални избори, а иднината на нејзината најдобра надеж, градоначалникот на Истанбул, Екрем Имамоглу, ќе зависи од исходот од овие избори.
Локалните избори би можеле да ја зајакнат контролата на турскиот претседател Ердоган по две децении на чело на Турција или да сигнализираат промена во длабоко поделениот политички пејзаж на членката на НАТО.
Резултатите, најверојатно, делумно ќе бидат обликувани од економските проблеми предизвикани од инфлацијата и од курдските и исламистичките гласачи кои ги одмеруваат перформансите на владата наспроти нивните сопствени надежи за политички промени.
Опозициските надежи за промени беа поттикнати од резултатите од локалните избори во 2019 година, кога опозицијата ја победи партијата АКП на Ердоган во Истанбул и Анкара, градови со кои владееше АКП и нејзините исламистички претходници 25 години.
Но, Ердоган успеа да го задржи претседателското место минатата година и да освои парламентарно мнозинство со националистичките сојузници и покрај загриженоста на гласачите за трошоците за живот. Ова доведе до распаѓање на широкиот опозициски сојуз.
Анкетите покажуваат дека актуелниот градоначалник Имамоглу и поранешниот министер Мурат Курум, кандидатот на АКП, се во тесна трка во Истанбул, градот со 16 милиони жители каде Ердоган се прослави како градоначалник во 1990-тите.
Актуелниот опозициски градоначалник води во главниот град Анкара. Ердоган бара поголема улога за Турција на светската сцена и се обиде да ги поправи нарушените врски со многу земји во последниве години, вклучително и на Блискиот Исток. Сепак, Ердоган рече дека Турците треба да гласаат за АКП за да се бранат од непријателите, но не прецизираше кои.