Стотици албански ветерани од косовскиот конфликт протестираа со барање мисијата на ЕУ во Косово ЕУЛЕКС да ја напушти земјата, по апсењето минатиот месец на поранешниот бунтовник и актуелен политичар Фатмир Лимај за извршени воени злосторства, јави БТА.
Демонстрантите скандираа „ЕУЛЕКС Надвор!“ и носеа транспаренти со амблемот на веќе забранетата Ослободителна војска на Косово (ОВК) пред седиштето на мисијата во Приштина.
Претставникот на асоцијацијата на албански ветерани Мухарем Џемаили денеска изјави дека мисијата сака да „ја оцрни борбата на ОВК“.
ЕУЛЕКС мисијата, која брои околу 3.000 члена, помага на Косово во случаите поврзани со воени злосторства и организиран криминал. Таа често има судири со владејачката коалиција, која е составена главно од поранешни борци, јавуваат американски медиуми.