Косовската страна на следниот состанок во Брисел ќе побара Белград да ги укине „паралелните структури“ во северниот дел на Косово, пишува приштинскиот весник „Експрес“.
Косовскиот премиер Хашим Тачи ќе побара укинување на институциите од српскиот колега Ивица Дачиќ на следната средба во Брисел, која се очекува на почетокот на следниот месец.
Покрај тоа, Тачи планира да побара и спроведување во пракса на договорот за интегрирано управување со граничните премини.
Од друга страна, косовскиот вицепремиер Хајредин Кучи изјави дека косовските официјални претставници немаат идеја како Брисел на преговарачка маса ќе го стави прашањето за северниот дел на Косово, каде Србите се мнозинство.