Известувачот на Европскиот парламент за Србија, Јелко Кацин оцени дека договорот помеѓу Белград и Приштина не мора да биде потпишан денес, но дека е од пресудна важност да се постигне во најкраток рок, бидејќи како што рече времето изминува.
-Од пресудна важност е договорот да се постигне во најкраток рок, за да Советот на министри за надворешни работи го уважи напредокот и препорача отворање на преговори за членство во ЕУ. Исто така, ЕУ во наредните денови треба да ја усвои резолуцијата за напредокот на Србија во европските интеграции – наведе Кацин.
Тој додаде дека српските и косовските лидери треба да ја уважат политичката реалност и да ги искористат шансите кои се отвораат на патот кон ЕУ.
-Сите отворени прашања во процесот за нормализација на односите помеѓу Србија и Косово мора да се решат со дијалог. Сметам дека главно прашање е кога, а не дали ќе дојде до договор за Косово. Во таа смисла, со право е истакнато дека вторник не е „ден Д“ кога договорот мора да биде потпишан- изјави Кацин.
Елена Георгиевска