Еден од двата реактори на романската нуклеарка Чернавода, во близина на каналот Дунав-Црно Море, ненадејно вчера е исклучен, пренесе романската агенција Медијафакс.
Извештајот се заснова на изјавата на Думитру Дина, шеф на државната групација Нуклеарелектрик, која има мнозински удел од акциите во нуклеарната централа Чернавода, а ИТАР-ТАСС наведува, повикувајќи се на соопштение на компанијата, дека реакторот престанал да работи поради дефект во системот за ладење на електричниот генератор.
Во соопштението се вели и дека инцидентот не предизвикал сериозни последици, пишува руската новинска агенција, додавајќи дека поради исклучување на реакторот производството на електрична енергија е двојно намалено.
Чернавода е единствената нуклеарна централа во Романија за производство на електрична енергија, која е пуштена во употреба во 1996. , а има два реактора од канадско производство, од кои секој има капацитет по 700 мегавати.
Тие произведуваат околу 20 отсто од електричната енергија која е потребна на Романија.