Постигната е согласност Приштина да отвори канцеларија за врски во Белград, која ќе се вика „Канцеларија за врски на Република Косово во Србија“, соопшти косовскиот министер за надворешни работи, Енвер Хоџај.
Со тоа се согласила и високата претставничка на ЕУ за надворешна политика и безбедност Кетрин Ештон, стои во весникот „Коха диторе“.
– Јас го цитирам она што е постигнато со договор. Прво, двете страни се согласиле, додека госпоѓа Ештон тоа му го потврдила на премиерот Хашим Тачи дека името ќе биде „Канцеларија за врски на Република Косово во Србија“. Не велам дека тоа ќе биде амбасада, туку име на канцеларијата кое ќе се употребува и во самата канцеларија на нашиот амбасадор и во сите други официјални документи – изјави Хоџај.
Српската Влада го именувала Дејан Павичевиќ за офицер за врски со Приштина.