Косовскиот премиер Хашим Тачи денеска престојува во официјална посета на Софија, каде што домаќин му е неговиот бугарски колега Бојко Борисов.
Како што соопшти бугарската новинска агенција БТА, двајцата премиери разговарале за меѓусоседските состојби во регионот, и додека Тачи зборувал за суверенитетот на Косово, Борисов ја нагласил поврзаноста со Србија.
„Бугарија и Србија имаат добросочувани пријателски односи и Софија го поддржува Белград на патот кон ЕУ”, изјавил Борисов, изразувајќи надеж дека сите склучени договори ќе се почитуваат, а раните од војната ќе бидат заборавени.
Тачи изјавил дека „Косово е европска земја и има цел да се приклучи кон ЕУ што е можно поскоро”.
Бугарија уште во март 2008 година ја призна независноста на Косово, по консултацијата со Хрватска и Унгарија сите три земји, соседи на Србија, да го направат тоа истовремено.