Грција ги осуди инцидентите во албанските градови Пермет и Ѓирокастро и го повика албанскиот амбасадор во Атина, за да му врачи протестна нота.
Атина ги означи како недозволиви судирите во градот Пермет меѓу православните христијани и полицијата, испратена за да биде спроведена одлуката на Врховниот суд за враќање на православниот храм на општинските власти.
Во соопштението на грчкото Министерство за внатрешни работи се изразува загриженост и поради нападите од страна на непознати лица, кои со камења гаѓаа кон генералниот конзулат на Грција во градот Ѓирокастро. Во нападите се ранети двајца Грци, а врз објектот е нанесена материјална штета.
– Очекуваме виновниците да бидат уапсени од албанските власти, кои се должни да им стават крај на ваквите недозволиви инциденти, се нагласува во соопштението.
Ситуацијата во Пермет, по судирите меѓу православните жители и полицијата, која пред некој ден со сила влегла во храмот, според грчките медиуми се уште е тензична.
Православните христијани се уште се наоѓаат во зградата. Албанските локални власти тврдат дека храмот им припаѓа ним и оти тоа е културен центар.
Зградата била конфискувана од поранешниот комунистички режим во 1968 година и е претворена, како и стотици други цркви во земјата, во културен центар.