На грчкиот остров Самос вчера беше уапсен, а денеска изведен пред истражен судија во Атина, 38-годишен тренер по едрење за кој постојат обвинувања и пријава дека пред неколку години силувал 11-годишно девојче.
Случајот, кој е дел од бранот сведоштва за сексуално злоставување што се прошири низ Балканот, го откри поранешната грчка олимписка шампионка во едрење Софиа Бекатору, која и самата, како што јавно говореше, била жртва на сексуално насилство пред 23 години.
За време на исказот пред јавен обвинител, рекла дека нејзиниот, не е и единствен случај поврзан со Грчката едриличарска федерација и по согласност, од сега веќе 20-годишната спортистка, доставила информации за новиот случај.
Потоа следела пријава и од девојката и од нејзините родители.
Обвинетиот 38-годишен човек, говорејќи за грчките медиуми, ги отфрли обвинувањата, тврдеше дека не станува збор за сексуална злоупотреба или силување, бидејќи со тогаш малолетното девојче, а сега 20-годишната, биле во врска, но не кога таа имала 11 години, туку неколку години подоцна, а дури и планирале брак.
Според грчките медиуми, тренерот кривично ќе одговара за три дела континуирано силување, континуирана злоупотреба на малолетно лице и сексуална злоупотреба, а денеска добил време до четврток да ја подготви неговата одбрана.