Грчката полиција стравува од нов терористички напад, а причина за загриженоста е фактот што досега никој не преземал одговорност за нападот врз канцеларии на владејачката партија Нова демократија на 14 јануари и експлозијата на бомба во најголемиот трговски центар во Атина на 20 јануари.
Ова според полицијата значи дека извршителите на двата напада не ги исполниле своите планови до крај.
Информацијата дека за време на нападот врз канцелариите на Нова демократија напаѓачите имале и минофрлач, кој не не бил употребен, го зголемува стравот кај властите. Полицијата смета дека напаѓачите сакале да го употребат минофрлачот, но биле изненадени од случаен сведок и затоа само отвориле оган од пушка „калашњиков“ и пиштол „Магнум“.
Анализирајќи ги податоците, властите дошле до заклучок дека можеби се подготвува нов сериозен напад врз политички цели.