Невообичаен и добро испланиран грабеж се случи во една белградска населба, кога непознат провалник влезе во приватна куќа и однесе сеф со огромна сума пари и вредни предмети, пишува „Telegraf.rs“.
На 21 август, сопственикот на куќата доживеа вистински шок кога се врати дома и ја затекна вратата скршена. Веднаш повика полиција и пријави дека од неговиот дом недостасува сеф во кој имало околу 400.000 евра во готовина, како и големо количество златен накит.
Сè укажува на тоа дека грабежот бил темелно подготвен и дека крадецот имал точна информација.
Провалникот точно знаел дека сопственикот на куќата не бил дома во изминатите седум дена, што му дало доволно време незабележано да влезе во објектот, да го пронајде добро скриениот сеф и да го изнесе од куќата.
Припадници на Министерството за внатрешни работи веднаш излегле на местото на настанот, извршиле детален увид и спровеле форензичка обработка на теренот.
Од местото биле земени сите отпечатоци од прсти и биолошки траги што би можеле да доведат до идентификација на осомничениот.
Истрагата е во тек, а полицијата ги прегледува и снимките од безбедносните камери од околните улици.