Три фирми од Турција купиле од претпријатија од Босна и Херцеговина околу 130 милиони куршуми, чаури, зрна и каписли за муниција, а се завршило во Сирија, во рацете на припадници на групи блиски до Ал Каеда, што се борат против режимот на Башар ал Асад, пишува весникот „Глас Српске“.
Муницијата и делови за нејзино производство се купени минатата година од компании за производство и промет на оружје во Коњиќ и Горажде, изјави за весникот извор близок до Министерството за одбрана на БиХ.
Според четири налози под ист број, компанијата „Макина ве Кумун“ од Анкара, купила од претпријатието „Игман“ од Коњиќ пет милиони куршуми, милион чаури и 500.000 парчиња зрна, наведува весникот.
Компанијата „Анатоли фисек“ набавила од „Унис Гинекс“ од Горажде 60 милиони каписли, тврди изворот за весникот.
Весникот „Независне новине“ наведува, дека турските компании користат стратегија за набавка на муниција во делови, бидејќи е полесно на тој начин да се пренесе преку граница.
Муницијата се полни во Турција, каде има кампови за обука на доброволци кои се борат на страната на сириските бунтовници.