Преку Инвестициската рамка за Западен Балкан (VBIF), Европската унија одобри дополнителни 1,2 милијарди евра за подобрување на железничката инфраструктура и управувањето со водите.
VBIF на својата веб-страница објави дека оваа сума најмногу е наменета за модернизација на железницата со цел да се зголеми брзината на возовите во Србија и управувањето со водите и изградбата на потребната инфраструктура во Босна и Херцеговина и Црна Гора.
Иницијативата годинава ќе поддржи вкупно осум проекти од областа на водоснабдувањето, канализацијата и прочистувањето на отпадните води, железничкиот сообраќај, вклучително и зелената трансформација на малите и средни претпријатија.
Инвестициската рамка главно се финансира од ЕУ со придонеси од земјите-членки на Унијата, Норвешка и меѓународни финансиски институции.
Досега, ЕУ има одобрено програми во вредност од 17,5 милијарди евра во областа на Западен Балкан во рамките на Економскиот и инвестицискиот план, вклучително и 5,4 милијарди евра грантови од ЕУ.
VBIF е заедничка финансиска платформа лансирана пред 15 години, која ги обединува Европската комисија, финансиските организации, земјите-членки на ЕУ и Норвешка, со цел да се подобри соработката во инвестициите во јавниот и приватниот сектор.