Специјалниот претставник на САД за Западен Балкан, Габриел Ескобар, денеска изјави дека нема алтернатива за европската интеграција на Западниот Балкан и оти помагањето од ЕУ на тој процес е единствениот одговор на претстојната економска криза предизвикана од војната во Украина.
На вториот ден од Бледскиот стратешки форум што ги собра лидерите од регионот и другите европски земји, Ескобар рече дека ЕУ мора да направи многу за да го поедностави процесот на интеграција.
„Но, многу повеќе мора да направат владите на државите од своја страна за да се овозможи процесот на интеграција, додека некои држави воопшто не ги исполнуваат своите обврски“, рече заменик-помошникот државен секретар на САД.
Ескобар рече дека единствениот одговор на економската криза што надоаѓа е економската интеграција на регионот и оти ја поддржува секоја иницијатива од тој тип, вклучително и иницијативата „Отворен Балкан“.
„Не ни треба нова стратегија за интеграција. Треба да вложиме двојно повеќе енергија во спроведувањето на стратегијата што ја имаме сега“, рече тој на панелот одржан под наслов „Европската унија и Западен Балкан: Кој е подготвен“.
Извор: МИА