Високата претставничка на ЕУ за надворешна политика и безбедност Кетрин Ештон денес ќе се сретне со политичките претставници на Приштина.
Таа во Приштина допатува вчеравечер, а серијата од денешните средби ќе ја започне со разговорот со претседателката на Косово, Атифе Јахјаги и премиерот Хашим Тачи.
Ештон со Тачи ќе разговара за понатамошниот дијалог за нормализација на односите помеѓу Белград и Приштина и подготовките за наредниот состанок најавен за 20-ти март.
Планирана е и средба на Ештон со претставниците на политичките партии на Косово на која треба, како што изјави Тачи да се објаснат сите дилеми околу процесот на разговор на премиерите на Косово и Србија.
Тачи пред пристигнувањето на Ештон изјави дека очекува посетата да биде поттик за постигнување договор за нормализација на односот со Белград и дека разговарал со заменик помошникот на државниот секретар на САД, Филип Рикер во врска со процесот на резговорот кој го води Брисел.
Српскиот премиер Ивица Дачиќ вчера изјави дека доаѓањето на Ештон во Белград е неизвесно и дека Брисел нема потврда за нејзино доаѓање, додека американскиот амбасадор Мајкл Кирби очекува по посетата на Приштина да дојде во Белград.
Премиерот Дачиќ оцени дека посетата на Ештон како и состанокот во Брисел 20- март зависат од нејзините процени по посетата на Приштина.
Ниту во Брисел вчера не можеле да потврдат дали високата претставничка по Приштина ќе го посети Белград.
Елена Георгиевска