Турскиот претседател Реџеп Таип Ердоган денеска му рече на рускиот претседател Владимир Путин дека соработката меѓу Турција и Русија е клучна за обезбедување мир и стабилност во Сирија, се вели во соопштението од кабинетот на Ердоган.
Во телефонскиот разговор со Путин, Ердоган ја истакна важноста на заедничката соработка меѓу Анкара и Москва за постигнување постојана стабилност во Сирија, истовремено поддржувајќи го територијалниот интегритет на земјата, се вели во соопштението.
Тој рече дека Турција и Русија можат заеднички да се спротивстават на напорите за дестабилизација на Сирија со поттикнување на етнички и секташки поделби и повика на целосно укинување на санкциите наметнати на земјата.
Ердоган, исто така, се заложи за враќање на сириските ресурси на централната влада и ја повтори поддршката на Турција за интеграција на Сириските демократски сили предводени од Курдите во националната администрација.
Тој ја истакна потребата да се елиминираат „терористичките закани“ со цел да се обезбеди долгорочна регионална стабилност.
Турскиот претседател ја опиша турско-руската соработка како клучен фактор за решавање на регионалните предизвици и ја потврди активната улога на Турција во следењето на конфликтот. Тој ја изрази подготвеноста на Анкара да биде домаќин на мировни преговори за праведно и трајно решение за Сирија.