Турскиот претседател Реџеп Таип Ердоган остро го критикуваше американското вето на резолуцијата на ОН со која се бара прекин на огнот во Појасот Газа и рече дека треба да се реформира Советот за безбедност на ОН.
За резолуцијата на Советот за безбедност во петокот гласаа 13 земји, при што Велика Британија беше воздржана, а Соединетите Држави ставија вето на текстот со кој се повикува на „итен хуманитарен прекин на огнот“ во Газа, и покрај притисокот од генералниот секретар на ОН кој го осуди „колективното казнување“ на палестински народ.
„За жал, прекинот на огнот беше отфрлен, само Америка гласаше против. Дали е тоа правда? праша Ердоган на состанокот за човекови права во Истанбул.
Ердоган ги обвини и Вашингтон и Советот за безбедност на ОН дека се на страната на Израел и покрај влошувањето на хуманитарните услови во Газа. „Праведен свет е можен, но не со Америка“, обвини турскиот претседател. „Човештвото не може да напредува со ваков вид Обединети нации, со ваков Совет за безбедност“, рече тој. „Советот за безбедност мора да се реформира“, додаде тој.
Турскиот министер за надворешни работи Хакан Фидан во интервју емитувано по седницата на Советот за безбедност на ОН изјави дека Америка останува сама на својот став.
„Нашите пријатели повторно рекоа дека Америка сега е оставена сама, особено по денешното гласање во ОН“, рече Фидан во во интервју за ТРТ.
Фидан ја даде изјавата по состанокот со колегите од Организацијата за исламска соработка и Арапската лига кои се сретнаа со американскиот државен секретар Антони Блинкен во Вашингтон. Турција, членката на НАТО, за разлика од нејзините западни сојузници и земјите од Персискиот Залив, не го смета палестинското исламистичко движење Хамас за терористичка организација.
Нацрт-резолуцијата беше подготвена откако генералниот секретар на ОН Антонио Гутереш во писмо до Советот за безбедност го активираше членот 99 од Повелбата на ОН, првпат откако ја презеде функцијата во 2017 година, што му овозможува на генералниот секретар да го донесе во Советот за безбедност внимание „секое прашање што, според него, може да го загрози одржувањето на меѓународниот мир и безбедност“.