Алијансата не треба да биде дел од украинскиот конфликт, не треба да се пропушти можноста за мир, изјави турскиот претседател Реџеп Таип Ердоган на средбата со генералниот секретар на НАТО – Марк Руте во Анкара.
Кабинетот на Ердоган соопшти дека турскиот лидер нагласил дека Анкара ги интензивирала напорите да стави крај на војната меѓу Украина и Русија со воспоставување траен и праведен мир и дека разговарал со рускиот претседател Владимир Путин и со украинскиот претседател Володимир Зеленски.
„Тој изјави дека Турција силно го поддржува воспоставувањето сеопфатен прекин на огнот и стои на својот став дека НАТО не треба да биде дел од оваа војна и дека не смее да се пропушти можноста за мир“, се вели во соопштението од кабинетот на турскиот лидер.
За време на средбата, двајцата претставници разговараа за односите меѓу Турција и НАТО, развојот на ситуацијата околу конфликтот меѓу Украина и Русија, регионалните и глобалните прашања.