Во Велебитскиот канал во Хрватска е во тек координирана акција за потрага и спасување на четворица помлади државјани на Португалија, кои исчезнале откако во текот на ноќта, и покрај силното невреме, со мал гумен чамец тргнале на рекреативно веслање.
Националниот центар за координација на потрага и спасување на море (MRCC Риека) ја добил пријавата за исчезнувањето на 12 август во 4:41 часот од познаничка на исчезнатите.
Според нејзините информации, четворицата пријатели со гумен чамец долг околу 1,5 метри тргнале од камп северно од Сењ кон Сењ, по што им се изгубила трагата.
Во областа од вчера владеат исклучително неповолни временски услови, со силна бура и бранови високи до три метри. Поради тоа, MRCC Риека веднаш започнал акција за потрага и спасување во координација со Капетанијата на пристаништето Сењ, Капетанијата на пристаништето Риека и испоставата во Нови Винодолски.
Досегашната потрага резултирала со пронаоѓање на напуштен пловечки објект во близина на брегот на островот Крк. Според описот, станува збор за чамец кој одговара на оној со кој се користеле исчезнатите лица.
Во 9:10 часот MRCC Риека побарал во потрагата да се вклучат сите расположливи пловила од составот на ППАП Риека, штом временските услови го дозволат тоа. Дел од единиците биле повлечени во заветрина поради исклучително неповолните услови во поголемиот дел од подрачјето на потрагата.
Од хрватското Министерство за море информираат дека се регистрирани оркански удари на бурата од околу 60 јазли, додека висината на брановите надминува два метра.
Во потрагата ќе се вклучи и авион „Pilatus PC-9“. MRCC Риека побарал од Хрватската крајбрежна стража негово ангажирање за пребарување на поширокото подрачје на Велебитскиот канал.
За текот на координираната акција MRCC Риека редовно ја известува Полицијата на приморско-горанската жупанија. Полицајци од Полициската станица Цриквеница се ангажирани во патролирање долж копнениот дел од брегот и во собирање информации за исчезнатите.
Потрагата продолжува, а нејзиниот понатамошен интензитет ќе зависи и од временските услови во Велебитскиот канал.