Заштитениот сведок во делото против ултранационалистичката организација Ергенекон во Турција денеска пред судот тврдеше дека се подготвувал атентат врз премиерот Реџеп Таип Ердоган.
Сведокот тврдеше дека атентатот требало да биде извршен по наредба на резервниот генерал на турската жандармерија Вели Кјучјук, осомничен за случајот Ергенекон. Наводно, генералот врбувал работник во автопералната, што е во близина на домот на Ердоган, да го елиминира премиерот. Но, работникот се откажал.
Атентатот бил планиран во 2004 и 2005 година и требало да биде извршен со автомобил-бомба.
Заштитениот сведок работел како информатор на разузнавањето на жандармеријата од 1991 до 1999 година. Тој спомна и имиња на други офицери, како и за средби со припадниците на руската разузнавачка агенција КГБ и тајните служби.
Во своето сведочење, заштитениот сведок наведе дека армискиот генерал Левент Ерсоз во 2005 година тврдел дека има можност претседателот да биде отруен од неговата сопруга.
– Многу сме силни. Ако е потребно, можеме да ја натераме дури и сопругата да го отруе претседателот, наводно кажал Ерсоз.
Стотици офицери, адвокати, научници и новинари се обвинети за членство во Ергенекон, организација која подготвувала воен удар против владејачката Партија на правдата и развојот (АКП).