Грција е подготвена ќе обезбеди невоена поддршка за групата земји кои се подготвени да и се спротивстават на Исламската држава, позната како ИСИС или ИСИЛ, јави дописникот на МИА од Атина.
– Ние ја поздравуваме и ја изразуваме нашата политичка поддршка за создавање глобална алијанса на држави што ќе ги координира меѓународните напори против Исламската држава, терористичка организација чии активности предизвикаа бес и едногласна осуда од страна на целиот цивилизиран свет, соопшти грчкото Министерство за надворешни работи.
По самитот на НАТО во Велс минатата недела, голем број земји, вклучувајќи ги и Велика Британија, Франција, Германија, Италија, Полска, Данска, Турција, Австралија и Канада, се согласија да ги здружат силите со САД во борбата против екстремистичката група.
– Ја изразуваме нашата солидарност со ирачката Влада, со христијаните и сите погодени етнички и верски заедници во регионот кои страдаа од варварските постапки на Исламски калифат, екстремистичка џихадистичка организација, која мора да биде уништена, се истакнува во соопштението на грчкото МНР.