Новата албанска Влада одлучи да забрани градежни работи во некои од историските области, со цел да ја стави под контрола алармантната состојба, која настана поради стотиците илјади незаконски градби во земјата.
Албанскиот премиер Еди Рама изјави дека согласно одлуката на неговиот кабинет, најпрво заштитени ќе бидат Берат, Ѓирокастро и Круја, поради историските и културните вредности, пронајдени во овие три градови.
Рама истакна дека во тие три населени места, кои се дел од културното наследство на УНЕСКО, нема да бидат издавани никакви дозволи за градба.
– Нашето културно наследство е соочено со голема опасност и затоа одлучивме да го блокираме издавањето на какви било дозволи за градење во градовите Берат, Ѓирокастро и Круја, изјави Рама.
Тој додаде дека слични мерки ќе бидат преземени и во други градови, меѓу кои и во главниот град Тирана.