Многу тешка вчера беше ситуацијата во Пирот каде што е вонредна состојба поради истекување на амонијак од вагоните што се превртеа во неделата вечерта кај Станичење. Истекувањето на опасната материја предизвика облак од пареа да се издигне над градот, поради што беа затворени училишта, градинки, бројни градски институции и некои фабрики.
Пиротската полиција вчера потврди дека во близина на местото каде од цистерната истекол амонијак е пронајдено машко тело, а соопштено е дека причината за смртта ќе биде утврдена со обдукција. Шеесетина лица побарале помош по истекување на амонијак по инцидент на пругата, беше кажано на состанокот на Градскиот штаб за вонредни состојби во Пирот. Во здравствените установи во Ниш и Пирот се згрижени 51 лице од кои три деца и сите се надвор од животна опасност. Вчера на болничко лекување имало 20 лица – осум пациенти во Пирот, а 12 лица во Ниш кои биле изложени на амонијак.
Градскиот штаб за вонредни ситуации постојано заседава, изјави вчера за „Политика“ градоначалникот на Пирот, Владан Васиќ, кој додава дека состојбата во градот попладне малку се подобрила.
– Најважната вест е дека во воздухот над градот по неколку мерења воопшто не е регистрирано присуство на амонијак. Исто така, официјално ни беше потврдено дека амонијак не стигнал до реката Нишава, со што се демантираат информациите објавени ноќта меѓу неделата и понеделникот дека еден од вагоните што излетале од шините слетал во реката и дека почнал да тече амонијак. Ниту еден од вагоните не слета во Нишава, а до истекување на опасен гас од вагонот-цистерна дојде затоа што претрпе значителна штета при лизгањето – рече Васиќ.
Од оштетената цистерна во текот на вчерашниот ден течеше опасен материјал, но со оглед на тоа што не стигна до реката, забраната за користење на вода за пиење низводно од несреќата беше само превентивна мерка.