Со потпишување на Кумановскиот договор пред точно 14 години, се стави крај на бомбардирањето на НАТО врз СР Југославија кое започна на 24 март 1999 година. Преставници на војската на Југославија и Обединетите Нации го потпишаа Воено-техничкиот договор на 9 јуни 1999 г.
Југословенската војска имаше рок од 11 дена да ги повлече своите војници и полицијата од Косово.
Акцијата што тогашната влада на СРЈ, но и многу странски експерти за меѓународно право ја нарекоа агресија, следеше по неуспешните преговори за решавање на Косовската криза во Рамбује и во Париз, водени во февруари и март 1999 година.
За материјалната штета што и’ е нанесена на тогашната држава во текот на бомбардирањата, се изнесуваат различни процени. Тогашните власти во Белград проценија дека штетата изнесува околу стотина милијарди долари и побараа надомест од земјите членки на Алијансата. Групата економисти Г17 ја процени штетата на 29,6 милијарди долари.
Бомбардирањето на Југославија заврши на 10-ти јуни 1999 година, со усвојувањето на Резолуцијата 1244 на Советот за безбедност на Обединетите нации. Ден претходно во Куманово претставници на Војската на Југославија и на НАТО потпишаа т.н. Воено-технички договор со кој беше прецизирано повлекувањето на силите на Војската на Југославија од Косово и влегувањето на меѓународните сили во тогашната српска покраина.
Во бомбардирањето загинаа околу 2.000 луѓе, а повеќе од 5.000 беа ранети. Нападите врз СРЈ кои траеја 78 дена тешко беа оштетени инфраструктурата, стопански објекти, училишта, здравствени установи, медиумски куќи, споменици на културата.
Петар Клинчарски