Во Кралскиот двор во Белград, кој што крие многу тајни, покрај српските владетели од династијата Караѓорѓевиќ, живееле и поранешниот претседател на СФРЈ, Јосип Броз Тито со својата сопруга Јованка, претседателот на СРЈ Слободан Милошевиќ, а помеѓу останатите гости од светот престојувал и рускиот претседател Владимир Путин.
Денес во Кралскиот дворски комплекс на Дедиње, живее престолонаследникот на Србија, Александар II Караѓорѓевиќ со своето семејство. Српски „Телеграф“ открива што има во Белиот дворец, во кој живее српскиот принц.
Наводно во времето кога Тито решил да се всели во комплексот, наредил сите амблеми на Караѓорѓевиќ, кои што биле на ѕидовите да се отстранат или покријат со црвена петокрака.
Најголема мистерија е онаа за гробот на Даворјанка Пауновиќ, најголемата љубов на Јосип Броз Тито, која тој наводно ја погребал во рамките на дворскиот комплекс и често го посетувал нејзиниот гроб.
Кралскиот дворец е изграден од лични средства на кралот Александар I Караѓорѓевиќ, а изградбата траела од 1924 до 1929 година. Самата зграда е изградена во српско-византиски стил, а фасадата е обложена со бел мермер. На првиот кат се наоѓаат библиотека, кралски кабинет, златна соба, голема трпезарија и хол за свечености, сите опремени во ренесансен стил.
Во тајната соба се наоѓа голема фонтана, која кралот, Тито и Слободан Милошевиќ ја ставале во функција кога имале желба со некого тајно да разговараат, бидејќи од жуборот на водата никој не можел да слушне што се случува таму.
Белиот дворец кој се наоѓа во истиот комплекс со Кралскиот двор е градена по желба на кралот Александар I како резиденција за неговите синови. Неговата изградба траела од 1934 до 1937 година, по проект на архитектот Александар Ѓорѓевиќ.
Во приземјето на оваа зграда се наоѓа голем салон за свечености и низа салони опремени во стилот на Луј XV и Луј XVI со венецијански лустери, како и дворската библиотека во која имало околу 35.000 книги.
Е. Г.