Документарецот „Меланија“, чиј буџет според проценките изнесувал околу 75 милиони долари, вклучувајќи ги и трошоците за правата и промоцијата, започна со прикажување во кината ширум светот и во регионот. Сепак, филмот се соочи со исклучително негативни реакции од публиката и од филмските критичари.
На платформата IMDb, документарецот моментално има рејтинг од 1,1 од 10, додека на Rotten Tomatoes оствари само 11 проценти позитивни критики, што го вбројува меѓу најслабо оценетите филмски наслови во тековната година.
Британскиот весник The Guardian во својата рецензија наведува дека животната приказна на Меланија Трамп можела да биде основа за значително поангажиран документарен филм, но дека остварувањето не успева да понуди подлабок увид во нејзината личност или во светот што го прикажува. Критичарот Ксан Брукс оценува дека фокусот на филмот главно е ставен на протоколарни детали поврзани со подготовките за инаугурацијата на Доналд Трамп, наместо на суштински теми кои би ја доближиле главната протагонистка до публиката.
Слична оценка дава и The Independent. Критичарот Ник Хилтон наведува дека иако животниот пат на Меланија Трамп – од Европа до Белата куќа – нуди потенцијал за силна нарација, филмот се задржува на ограничен временски период и на, како што оценува, маргинални детали. Според него, документарецот остава впечаток на содржински празно и стилски еднолично остварување.
Негативни реакции пристигнуваат и од гледачите. Дел од коментарите на IMDb укажуваат дека филмот се претставува како документарец, но дека недостига аналитички пристап и автентична перспектива. Гледачите забележуваат монотона нарација, бавен ритам и впечаток дека филмот има за цел да создаде позитивен имиџ, наместо критички да ја прикаже темата.
Во повеќе реакции се поставува и прашањето за оправданоста на високиот буџет, со оценки дека крајниот резултат не кореспондира со вложените средства. И покрај очекувањата дека филмот ќе понуди нови сознанија за поранешната прва дама на САД, доминантниот впечаток кај публиката и критиката е дека документарецот не успева да ја исполни таа цел.