Музичкиот могул и рапер Шон Комбс „Диди“ беше осуден на четири години и два месеци затвор по две обвиненија за транспорт со цел проституција.
Судијата Арун Субраманијан го осуди Шон Комбс на 50 месеци затвор и рече дека казната е фер бидејќи ги зема предвид сериозноста на злосторствата на Комбс и олеснителните околности.
Бидејќи ќе му се пресмета времето поминато во притвор, тој ќе биде во затвор 36 месеци – или три години. Судијата, исто така, го казни Комбс со парична казна од 1 милион долари – максималната дозволена сума.
Пред да се изрече пресудата, Комбс им се извини на своите поранешни девојки, пријатели и семејството, нарекувајќи го своето однесување „одвратно, срамно и болно“. Тој рече дека неговите деца „заслужуваат подобро“ и дека како син ја изневери својата мајка.
Порано во постапката за изрекување на пресудата, помошничката на американската обвинителка Кристи Славик му рече на судијата Арун Субраманијан дека „почитувањето на законот од страна на Комбс е само празно ветување“.
Славик рече дека Комбс веќе закажал говори за следната недела, очекувајќи евентуално ослободување од затвор. „Тоа е врвот на ароганцијата“, рече Славик.
„Дури и сега, кога му е изречена пресудата за две федерални кривични дела… тој не разбира целосно како неговите постапки го доведоа тука“, рече таа.
Во моментов не е познато каде Диди ќе ја отслужи својата четиригодишна казна, но она што се знае е дека неговиот правен тим ќе се врати на суд во понеделник за да разговара за случајот.