Во Арт центарот на Амбасадата на Турција во Париз вечер ќе биде промовирана монографија за сликарот Омер Калеши од авторот Јордан Плевнеш.
Публикацијата е во чест на 80 години живот и 50 години уметничка дејност на балканскиот сликар со македонско потекло, кој живее и работи во Париз. Објавена е билингвално, на француски и на турски јазик.
Во монографијата Плевнеш го вбројува Омер Калеши на врвот на интернационалното сликарство, низ иконографијата на неговата сликарска палета, која ги обединува балканските цивилизации со европската и светската историја.
На промоцијата се поканети да присуствуваат голем број претставници на француската и европската културна и дипломатска елита.
Омер Келеши е роден во кичевското село Србица во 1932. Се школувал во Скопје, а во 1956 емигрирал во Турција и во Истанбул ги завршил студиите на Ликовната академија. Потоа се преселил во Париз каде што живее и твори над 30 години.
Во септември годинава беше официјализирана донација на две дела од Калеши за колекцијата на Националната галерија на Македонија.